كشف أحمد حسن مدير منتخب مصر الثاني تفاصيل أزمة ركلة الجزاء في مباراة المنتخب أمام الكويت في كأس العرب.

وتعادل منتخب مصر مع منتخب الكويت إيجابياً بنتيجة 1-1 في الجولة الأولى من دور المجموعات بالبطولة.

وقال أحمد حسن مدير منتخب مصر المشارك في كأس العرب عبر تصريحات تليفزيونية: "ما يحزنني إن اللي اشتغلوا في مهنة التدريب بيتكلموا بدون معرفة يعني الناس قالت عمرو السولية مسك الكورة وليه عايز يشوط تاني وانا مستغرب من الكلام ده".

وتابع: "عمرو السولية مكنش عايز يشوط ضربة الجزاء الثانية بالعكس هو كان مستني إن احنا هنقوله مين هيشوط لإن إحنا عندنا ترتيب السولية رقم 1 ومحمد النني رقم 2 ومحمد مجدي أفشة رقم 3".

وأضاف:" أنا نفسي الناس تسأل قبل ما تتكلم والناس بتدور على السلبيات بس وعمرو السولية لم يكن لديه 1% نية لتسديد ركلة الجزاء الثانية".

وواصل:" إحنا كنا عايزين مروان حمدي يسدد ضربة الجزاء ولكن أفشة كان مسك الكرة وحلمي طولان طلب من عصام الحضري لإن صوته عالي أن ينادي على مروان حمدي ليكون هو المسدد لكن البعض ممن لا يحبون الحضري يريدون إظهاره بشكل سيئ".

واختتم أحمد حسن:" أنا قولتله خلاص أفشة مسك الكورة مش عايزين يبقى في أزمة بدون لازمة".